Kaldhol blir festivalforfattar i 2019!

Marit-Kaldhol Foto Øyvind EideMarit O. Kaldhol blir festivalforfattar under Falturiltu 2019. Festivalforfattaren er mest  kjent for sine poetiske og sterke forteljingar for barn og unge, både bildebøker, diktbøker og romanar. I tillegg har ho gjeve ut lyrikk, forteljingar og romanar for vaksne.  

Kaldhol debuterte i 1983, med diktsamlinga lattermilde laken. Seinare har barneboka Farvel, Rune gjort stor suksess, med sal til tolv land og tildeling av ei rekke internasjonale prisar, bl.a Premio Europeo Pier Paolo Vergerio og Deutsche Jugendliteraturpreis.

Bøkene hennar har vorte lansert i minst 15 land, og ho har mottatt Kulturdepartementet sin pris for barne- og ungdomslitteratur for bøkene kino og søkeord: ayotzintli og Nynorsk barnelitteraturpris for ungdomsromanen zweet.

Marit O. Kaldhol blir å treffa under årets Vossa Jazz, i samarbeid med Falturiltu: https://vossajazz.no/arrangement/badnajazz-marit-o-kaldhol/

 

Rekordar i fleng

45814958_261617051211090_4163365662644764672_nMe i Falturiltu har telt opp publikum på dei nitti (ny rekord)  arrangementa som har blitt avvikla i ti kommunar (også ny rekord) i  festivalveka, og talet er 7038, over tusen fleire enn i 2017. Dette gjev verkeleg energi til å gå i gang med planlegginga av neste års festival.

Tusen takk til festivalforfattar Kari Stai og  alle andre forfattarar, musikarar, bildekunstnarar, dokkespelarar, føredragshaldarar, frivillige, samarbeidspartnerar og ikkje minst publikum, som gjorde Falturiltu 2018 til ein ny milepæl.

Me sjåast i veke 45, 2019!

 

Vinnaren er klar

image

Brynjar Stautland stakk av med førsteplassen i Sunnhordlandslåten 2018, med låten Himmel og horisont

Juryen, beståande av musikar og låtskrivar Endre Olsen, musikar, musikkprodusent i NRK, Aleksander Solhaug Vallestad og Hilde Førland Eide frå Mediehuset Sunnhordland, uttaler følgande:

Himmel og horisont er ei vakker vise med ein tekst som kler Sunnhordlands-landskapet og kulturen på vestlandet. Spesielt refrenget er storslått og sit som ei kule. Teksten er svært velskriven og har ikkje har eit ord for mykje, eller for lite. Mellom linjene ligg derimot så mykje informasjon som lyttaren berre måtte ønska å fylla inn. Ein kan ana gjenklang frå vante nyheitsbilete dei siste åra, utan at det verkar påtrengande politisk. Her er òg rom for håp i dei mange fine tekstlege bildene: «du er tonane i ein song», «du er morgonen atter ein gong». Det mørke mollstemte musikalske landskapet kler teksten i eit høvande alvor, samstundes som dei få akkordane gir den rom nok til å synka skikkeleg inn hos lyttaren. Ganske enkelt formfullendt!

Vinnaren vil framføra låten under Falturiltufest, i Stord kulturhus, 4. november. Dette blir ei skikkeleg feststund for heile familien der bandet Building Instrument tar med seg animasjonskunstnar Simone Hooymans, koristane i Aspane og musikklina sitt vokalensemble i eit unikt samarbeid. Kari Stai sine karakterar Jakob og Neikob blir også gjort levande ved hjelp av teaterelevar i Stord kulturskule.

Falturiltuprogrammet 2018

Kari-Stai3kutt

Kari Stai er blant landets aller mest folkekjære og prisvinnande forfattarar og illustratørar, spesielt på grunn av sine fem bøker om Jakob og Neikob, og det er ei stor ære å ha henne som festivalforfattar og heidersgjest i heile veke 45. Tema i år er bildebøker, og det kjem til å prega heile programmet. I tillegg til Stai får ein treffa eit A-lag av norske illustratørar: Øystein Runde, Ida Neverdahl, Jens K. Styve, Gry Moursund, Vegard Markhus og Sissel Horndal.

Stai blir sjølv å treffa på skular og bibliotek i alle Sunnhordlandskommunane, og figurane hennar møter me allereie på opningsdagen, laurdag 3. november, då det blir dramatisering av Mopp og Mikko på Spinae. Dagen etter møter me  Jakob og Neikob under Falturiltufest i Stord kulturhus. Her stiller også bandet Building Instrument i eit eineståande samspel med animasjonskunstnar Simone Hooymans og kor frå kulturskulen og musikklina.  Blodrik møter me i ei turnerande framsyning laga av studentar på musikk og kunst og handverk ved HVL, som for første gong tek Falturiltu ut til kommunane Haugesund og Os. Eit nytt festivalsamarbeid med Øyobiblioteket gjer at det og blir presentert ein nynorsk debutant i Haugesund: Sumaya Jirde Ali er med boka Ikkje ver redd for sånne som meg blitt ei viktig ung røyst i den norske samfunnsdebatten.

Samlaget fyller 150 år i år og blir feira med kakefest og lesestund med Stai i Kunsthallen, tysdag 6. november.

Av nyskapingar i år får ein blant anna arrangementet Klassikartimen, der me denne første gongen set fokus på bildeboka Farvel, Rune. Kari Stai møter forfattar Marit Kaldhol og illustratør Wenche Øyen til samtale.

Me får besøk av to dokkeframsyningar, Himmelspringaren, basert på Sissel Horndal si bok, og debutant Irene Ahnéll med Pling Vaken.

Bokbåten EPOS ligg ved Leirvik kai, onsdag 7. november, og her blir det to arrangement ombord. Gudespor, forteljarkunst, undring og filosofi, og teiknebattle med Øystein Runde og  Ida Neverdahl.

Sunnhordland Museum og Venelaget for Gruo er medarrangørar for arrangemenet GRUVEGRØSS, der skuleelevar får omvising i gruvene på Litlabø og skummel lesestund med Linn T. Sunne.

Frode Grytten blir bokbada av elevar ved Stord VGS, og på ungdomsskulane blir det bokbad med Alf Kjetil Walgermo, Jens K. Styve og Arnfinn Kolerud.

Det blir to utstillingar i Stord kulturhus, ein ved Fitjar VGS i foajeen og ein ved Gry Moursund i Kunsthallen.

Dei hesteglade får sitt under Stallturiltu, der det blir presentasjon av hestebøker, riding og andre hesteaktivitetar i Stord Hestesportsenter på Tyse.

Dei vaksne får sjølvsagt sitt også under Falturiltu 2018. Blant anna blir det to fagseminar om formidling, for lærarar, bibliotekarar og andre litteraturformidlarar. Forfattar og journalist Alf Kjetil Walgermo møter bandet Himmelhamn i Stord kyrkje, onsdag 7. november, og jazzbandet Come Shine kjem til Stord kulturhus med dei legendariske poetane Jan Erik Vold og Einar Økland, fredag 9. november. Stord mållag arrangerer vaksenbokkveld med Marit Eikemo og Ruth Lillegraven, medan Stord og Bømlo bibliotek arrangerer bokbad på Stord med forfattar Solfrid Sivertsen som nyleg kom ut med novellesamlinga Ho sykla bort og andre noveller. Microbandet avsluttar festivalveka på ARENA, med både lett underhaldning og samtale mellom fagbokdebutant Brit Aksnes og ordførar Gaute Straume Epland. I tillegg blir det bokbar kvar kveld på Sykkel & Kaffi.

Falturiltufest 2018

Det er klart for ei skikkeleg feststund for heile familien når bandet Building Instrument tar med seg animasjonskunstnar  Simone Hooymans, koristane i  Aspane og musikklina sitt vokalensemble i eit unikt samarbeid.  I tillegg får ein dramatisering av Kari Stai sine karakterar Jakob og Neikob, ved teaterelevar i Stord kulturskule, og presentasjon av vinnaren av Sunnhordlandslåten 2018.

Arrangementet er eit samarbeid med Stord Jazzklubb. Kjøp billett her!

Building Instrument er ein Bergensbasert trio som blandar akustiske og elektroniske uttrykk gjennom sine heilt særeigne komposisjonar. Tekstane er på skrivne på moldedialekt av vokalist Mari Kvien Brunvoll. Bandet hadde allereie bygd seg opp ei solid fanskare før dei platedebuterte til overstrøymande kritikkar i 2014. På deira andre album, Kem Som Kan å Leve (2016), var utrykket deira endå meir draumeaktig, lydbildet var større og meir innhaldsrikt, og det var framleis snakk om sterkt vanedannande og underleg fengjande musikk. Bandet består av:

Mari Kvien Brunvoll (stemme, diverse elektronikk, perkusjon, zither)

Øyvind Hegg-Lunde (trommer, perkusjon)

Åsmund Weltzien (diverse tangentar)

Simone Hooymans er med på videoanimering, som spesiell gjest under konserten på Falturiltu. Ho er opprinneleg frå Nederland, men bur og jobbar som animasjonskunstnar i  Ålvik i Hardanger.

9. november slepp Building Instrument sitt tredje album, Mangelen Min, også denne gong via det velrenommerte plateselskapet Hubro.

Nynorsk barnebokfestival på Stord