Falturiltufest!

Opplev festivalforfattar Per Olav Kaldestad med bandet Morgonfrosken, barnekoret Levande lys, Aspane og dansarar frå Stord kulturskule i ei skikkeleg festframsyning! Her blir det og presentasjon av vinnaren av Sunnhordlandslåten 2017!

Billett finn du her!

For den spretne, nyfikne og undrande Morgonfrosken er ingen tema for store eller for små. Universet, einsemd og kjærleik går hand i hand med vêr og vind, fugl og frosk. Musikken er ei fin blanding av norsk folkemusikk, viser og pop, og tekstane er henta frå boka Når Morgonfrosken syng av Per Olav Kaldestad.

Med den eminente folkemusikaren Annlaug Børsheim i spissen har trioen Morgonfrosken spelt ei rekke konsertar dei siste åra, mellom anna på Førdefestivalen, på Bajazz i Bergen og Badnajazzen på Voss. Hausten 2016 kom den fyrste plata til Morgonfrosken, med namnet «Og fjøla blei ein seglbåt og tanken blei ein vind». Den hausta mange godord frå både store og små tilhøyrarar.

Morgonfrosken:
Annlaug Børsheim – vokal, gitar, fele
Ingemund Askeland – banjo, klarinett, munnspel
Mari Skeie Ljones – fele og hardingfele
Linn Frøkedal – tangentar, bass og gitar
Kåre Opheim – trommer

 

Sunnhordlandslåten 2017

1024px-Øyvind_Staveland_2009Er du den nye Stein Torleif Bjella eller Odd Nordstoga? Uansett om du er åtti eller åtte år – og uansett sjanger:  vise, rock, reggae, country. Berre teksten er på nynorsk –  Spel inn låten din,  send den til oss og ver med i konkurransen om Sunnhordlandslåten 2017.

Vinnaren vil få framføra låten på Falturiltu sin festkonsert i Stord kulturhus, søndag 5. november. Her vil ein også få oppleva bandet Morgonfrosken i samarbeid med Aspane, barnekoret Levande Lys og dansarar frå Stord kulturskule.

I juryen finn ein Øyvind Staveland frå Vamp, musikar og låtskrivar Annlaug Børsheim, festivalforfattar Per Olav Kaldestad og Anita Haugland frå Mediehuset Sunnhordland.

Send ditt bidrag til: falturiltu@gmail.com.

Frist for innsending onsdag 11. oktober!

Linda Eide med strålande gjester

Under parolen språk er sjov! gyv Linda Eide laus på språklege fenomen, kuriositetar og historier. Ho hyllar og herjar med vår språklege kvardag, og byr inn til språkleg påfyll i ei hyggeleg og eksamensfri atmosfære! 

Pianist og komikar Sjur Hjeltnes sørgjer for musikalsk og verbal bækking av ypparste slag. Med seg på Arena, fredag 10. november, får dei mor og dotter, Kari og Selma Lønning Aarø!

Selma Lønning Aarø er fødd i 1972 , debuterte i 1995 og har seinare gjeve ut ei lang rekke bøker i ulike sjangrar, både for vaksne og born. Hennar siste roman, Hennes løgnaktige ytre, kom i 2016 til strålande kritikkar.

Kari Lønning Aarø er pensjonert lektor, forfattar og nynorskentusiast. Medlem i Norsk spåkråd 1998 – 2005, språkspaltist i Bladet Sunnhordland gjennom ei årrekke. Har gjeve ut praktbøkene Namnevandring i Stord og Fitjar og Ville blomar i Sunnhordland saman med fotografen Jan Rabben.

Sikra deg billett her!

Parr og Fiske til Falturiltu 2017

Det er ei stor ære å melda  at Maria Parr og Anna Fiske er stadfesta til årets nynorske barnebokfest på Stord.

Maria Parr har lenge vore ein av dei mest populære barnebokforfattarane i landet. Dei to bøkene ho har gjeve ut tidlegare er omsette til ei rekke språk, og har motteke litteraturprisar i inn- og utland. No er ho rykande aktuell med Keeperen og havet,  oppfølgjaren til debutboka Vaffelhjarte. Den nye boka har allereie fått strålande meldingar, Maria Parr er fremdeles god som gull, skriv NRK Bok, VG trillar femmar på terningen og  Aftenposten sin meldar konkluderer med at: «Parr er tilbake og overgår seg selv». Maria Parr vil blant anna delta under Stord kulturskule sin store konsert i kulturhuset, torsdag 9. november. Sikra deg billett her!

Anna Fiske har gjennom ei årrekke bidrege med sin særeigne strek, både i teikneseriar, som illustratør og som forfattar av eigne bøker. Hennar leikne, kreative nyskaping innan barnebokfeltet har gjort ho svært populær, og gjeve henne fleire høgthengande priser. Ho har blant anna vunne Bokkunstprisen, og har stått på pallen i Årets vakreste bøker fleire gonger. Hallo-bøkene hennar er kanskje spesielt  populære, og Fiske er vinnar av Skolebibliotekarenes litteraturpris 2016. Under Falturiltu blir ho blant anna å treffa under Stallturiltu, bok- og  hestefest i Stord Hestesportsenter på Tyse, søndag 5. november. Billett finn du her!

Falturiltu 2017 går av stabelen 4. – 10. november. Festivalforfattar i år er Per Olav Kaldestad, og me får elles møta Stein Torleif Bjella og mange mange fleire. Sjå opp for snarlege oppdateringar!

 

 

Stein Torleif Bjella til Falturiltu 2017


image”Bjella & Co har lagd det komplette album”, skreiv Dagbladet og trilla seks på terningen, då Stein Torleif Bjella sleppte sitt fjerde soloalbum, Gode Liv i 2016. Visekunstnaren sin solide katalog veks seg stadig større, og som iTromsøs anmeldar poengterte i si melding «Stein Torleif Bjella gjør det umulige mulig, nemlig å finne opp seg selv hver gang».

Stein Torleif Bjella gjorde seg for alvor bemerka med solodebuten Heidersmenn i 2009. Albumet blei svært godt motteke, og gjorde seg fortent til to spellemannominasjonar. To år seinare kom oppfølgaren Vonde Visu som, om mulig, ble endå betre motteken. Heim for å døy avslutta trilogien i 2013.

Som heilstøypt liveartist, har Bjella også markert seg. På små, intime klubbscener så vel som på landets aller største festivalscener. «Overveldende fantastisk, rett og slett», skreiv Dagbladet sin meldar etter å ha sett Bjella på Øya i 2011, og trilla seksar på terningen. «Gleden ved å være sørgmodig», konkluderte VGs anmeldar, etter å ha sett han på samme festival tre år seinare.

4. November kjem han til Arena med fullt band, samansett av landets beste musikarar.

Sikra deg billett her!

Nynorsk barnebokfestival på Stord