Publikum og presse er i skyene over det dei fekk oppleva i Stord kulturhus, sundag ettermiddag. «Fantastisk opning», oppsummerte Framtida.no, og avisa Sunnhordland sin meldar kalla det ein «Forrykande fargefest». Måndag 2. november var det klart for heile to utstillingsopningar. «Eg vart slått i bakken av alt det fine de har laga», sa Maria Parr då ho fekk sjå og opna utstillinga som sjettetrinnet på fleire stordskular har sett saman i Kunsthallen i Kulturhuset. I Galleri Giga opna multikunstnar Hans Sande den nydelege skulpturutstillinga Hjartet raknar, huset står. Begge utstillingane kan sjåast heile veka. På kvelden møtte nesten hundre små og store opp for først å gå Barnas Turlag si lommelyktløype i Vidsteenparken, og så høyra Maria Parr lesa eventyr i den stemningsfulle Museumshallen. Resten av veka er også stappfull av litterære hendingar. Sjekk programmet her og bli med!