Alle innlegg av Roald Kaldestad

Falturiltu fyller femten!

Festivalforfattar Ruth Lillegraven sine bøker for born vil vera den raude tråden i denne femtande Falturiltufestivalen. Du kan treffa henne heile veke 45 (5. – 12. november) blant anna ombord i bokbåten EPOS, både i Brandasund og Leirvik hamn, på leselystturne i 3. klassane på Stord, på Falturiltuseminaret på HVL, og mållagskveld i samtale med Agnes Ravatn og bokbadar Hege Myklebust. Både Småsceneri, Miljøagentane og studentar ved Høgskulen på Vestlandet vil laga framsyningar basert på festivalforfattaren sine bøker, og dikta hennar blir grundig feira i førestillinga Inn i det grøne, med Annlaug Børsheim Band, Stord Soul Children, dansarar og dramaelevar ved Stord kulturskule og born frå Heiane mottakssenter.

I tillegg blir det fleire utstillingar basert på Lillegraven sine tekstar, blant anna av 6. trinn på Leirvik skule, Fitjar VGS FBIE og med illustrasjonane til Mari Kanstad Johnsen og Jens Kristensen.

For å skikkeleg feira jubileet inviterer me til bursdagsfest med den originale programkomiteen, Helga Gunerius Eriksen, Per Olav Kaldestad og Atle Hansen. Dei tre har med seg musikar Anette Thorsheim, og les og syng i Print og Ramme på Leirvik.

Laurdag 6. november blir det heilhusfest i kulturhuset med kake i foajeen, kortfilmprogram med filmar av Bjørn Sortland og Martine Grande, Bok og Politibolle med Marianne Gretteberg Engedal i Stord folkebibliotek og Rullturiltu i skateparken med bokdebutant og skatar, Åshild Moldskred.

Mens me ventar på Goddo har me kalla den litterære søndagsturen, 7. november. Her vil det bli forfattarbesøk ved den nye dagsturhytta Kurebu. Same dag kan ein delta på Stallturiltu, bok- og hestefest på Stord hestesportsenter. Her vil forfattar og illustratør Trude Tjensvold lesa, og det blir barneridning og open kafé. For første gong vil det og bli arrangert ein polsk-norsk forfattardag i samarbeid med Wroclaw folkebibliotek, som kjem på besøk med polske barnebokforfattarar.

Annlaug Børsheim og Vibeke Flesland Havre vil framføre forestillinga si Tenk om eg var ein tanke og kunne reisa til deg, i Stord kulturhus, for inviterte skuleklassar.

Det flytande litteraturhuset EPOS vil ellers vera på rundtur i distriktet heile veka, blant anna med illustratørane og forfattarane Tetiana Kosovska og Vegard Markhus sitt band Naboen min om bord. Skulane i Sunnhordland- og Haugaland vil få besøk av blant anna teikneserieskaparane Ida Neverdahl og Arild Torvund Olsen, samt forfattarane Terje Torkildsen, Inger Johanne Sæterbakk og Harald Nortun.

Musikklina ved Stord vidaregåande skule inviterer til Haustkonsert med Anders Totland som litterær gjest.

Dei vaksne må også få sitt, så den nyopna baren Åtgaum blir arena for vaksenarrangement på kveldstid gjennom heile festivalveka. Her får ein Klassikartimen med Ragnar Hovland, Jon Fosse-program ved Sandra Kolstad, Vestlandsvegar med Halvor Følgerø, og Bokbar, leia av Ingelin Røssland, med Samlagsforfattarane Gaute Sortland, Mats Rage og Krista Lien Indrehus. Nyopna er også Fengeselet i Leirvik sentrum. Her blir det bokslepp med dramatikar Per Jan Ingebrigtsen og fotograf Øyvind Hjelmen.


Per Olav Kaldestad deltek på Internasjonal kulturklubb sin Språkkafé, med Selma M. Yonus si bok Vuggesang for liten kriger som han har omsett deler av, og Den kulturelle spaserstokken vil tilby besøk med Erna Osland og Inger Lise Belsvik.

Finn Tokvam og Olav Stedje sparkar i gang Falturiltu 2021, med musikk og humor, i ARENA, fredag 5. november, og det blir ellers konsertar med Bergen Mandolinband og Ingebjørg Bratland (obs! få billettar igjen)

Bergen Mandolinband til Falturiltu 2021!

Dei livstørste musikarane i Bergen Mandolinband kjem til Falturiltu for å spele muntre låtar som «I helvetes flammer», «Ferdig med Hans» og «Rundt og rundt i baren» for oss. Kjøp billett her!

Bandet til forfattar Gaute M. Sortland og felespelar Olav Christer Rossebø miksar heimelaga musikk med låtar som Rossebø har funne på sine reiser og gitt Sortland i oppgåve å lage nye tekstar til. Slik blir musikken ei blanding av det beste frå Cajunland og det verste frå vestlandet. Mørkt, sorgmuntert og særeige.

Bandet feirar i 2021 tjue aktive år, og i fjor slapp dei plata «Koss havna me her» til strålande kritikkar. Til Falturiltu kjem dei for å forsøke å svare på nettopp korleis dei hamna der dei er nå.

Olav Christer Rossebø: Fele og mandolin

Gaute M. Sortland: Gitar og vokal

Ingemund Askeland: Munnspel og banjo

Kjetil Olai Lundø: Kontrabass

Falturiltu fyller 15


Ta med familien på bursdagsfest!

Falturiltu fyller femten år i år, og kva er vel meir naturleg enn å laga bursdagsfest med heile den opprinnelege programkomiteen – forfattarane Atle Hansen, Helga Gunerius Eriksen og Per Olav Kaldestad. I tillegg har dei med seg musikar Anette Thorsheim. Her blir det friske dikt og fengande musikk, gitar og toradar, utstilling og kake. Falturilthurra!

Print og Ramme, torsdag 11. november, kl 17. Billett finn du her!

Frå 6 år

Stedje og Tokvam opnar Falturiltu 2021

Året er 1981. Olav Stedje gir ut debutalbumet Ta meg med. Albumet blir ein stor suksess, ikkje minst på grunn av klassikaren Vi vandrar saman, som blir årets mest spelte låt. Ta meg med blei starten på ei imponerande musikalsk karriere som til no altså har blitt 40 år. Når Stedje besøkjer oss har han ikkje berre med seg songar frå desse førti åra. Han stiller også med tekstforfattar og ven Finn Tokvam. Saman skal dei snakke om åra på vegen, og musikken. Det blir humor og alvor. Det blir populærmusikalsk sladder og rom sjølvsagt for allsong! Og viktigast av alt: Det blir røysta og gitaren til Olav Stedje.

Billettar finn du her!