Kategoriarkiv: Nytt frå Falturiltu

Prisvinnande forfattarar og artistar til Falturiltu 2022!

Det er ei stor glede å kunne røpa at både Tønes og Stein Torleif Bjella kjem til Falturiltu i veke 45 (4. -11. november). I tillegg er den strålande svenske barnebokforfattaren Oskar Kroon, Ragnar Hovland, Bente Bratlund og Aina Basso stadfesta. 

Tønes har vakse til å bli ein av landets desidert beste låtskrivarar og tekstforfattarar. På brei Sokndalsdialekt fortel han underfundige og humoristiske historiar om stort og smått. Tønes har gjeve ut ti album, og det siste, Thilda Bøes Legat, stakk av med Spellemannsprisen 2021 i klassen Viser og visepop. Han stiller på Arena, 11. november, med fullt band i ryggen.

Stein Torleif Bjella kjem i år til oss både som låtskrivar, lyrikar og romanforfattar. For romanen Fiskehuset vart han nyleg tildelt Nynorsk litteraturpris 2021, og han har ei perlerad av glimrande plateutgjevingar å ause av. Det er berre å gle seg til ein heilaften i Bjellas låt- og tekstunivers.

Oskar Kroon er forfattar og bakar. Han debuterte med Mitt fönster mot rymden i 2018. For den andre barneboka si, Vänta på vind frå 2019, mottok han den gjeve Augustprisen i heimlandet. Boka blei omsett til nynorsk i 2021, og var blant dei aller finaste bøkene som kom ut her i landet i fjor.

Aina Basso blei nyleg tildelt Samlagsprisen 2022, og ho er aktuell som festspeldiktar under Dei Nynorske festspela i år.  Ho kjem til oss med den rykande ferske boka Dei dødsdømde: dødsstraffa i Noreg og historia om nokre av dei som mista livet.

Ragnar Hovland og Bente Bratlund fyller begge 70 år i 2022, og begge vil bli grundig feira under årets festival. Ellers blir det gjensyn med kjende Falturiltu-klassikarar som Ballturiltu og Stallturiltu, i tillegg til at festivalen sjølvsagt har mange fleire godbitar på lur.

Meir støtte til Falturiltu

Det er ei stor glede å melda at Falturiltu 2020 er tildelt 75.000,- i prosjektmidlar frå Sparebanken Vest.

I vår fekk festivalen 195.000,- frå Kulturrådet, 60.000,- frå Haugaland Kraft og 40.000,- frå SKL, så årets økonomi er godt sikra for verdas største nynorske barnebokfestival. Me tek sikte på å gjennomføra i kjent  stil i veke 45 (31. oktober – 6. november) Atle Hansen er allereie presentert som festivalforfattar, og ellers er det meste av programmet spikra, med godbitar for kulturinteresserte i alle aldrar. Dette vil me sleppa rett over sommaren.

Per dags dato veit me jo lite om korleis hausten blir, men vit i alle fall at me kjem til å gjennomføra Falturiltu 2020. Me vil laga til ein festival som rettar seg etter smittevernråda frå styresmaktene, og dermed kan det henda det blir aktuelt med alternative løysingar, til dømes digital formidling. Det vil tida vise.

God sommar!
collagelogo

Nynorsk #Nettlest

Fem forfattarar på NettlestFalturiltu og Haugesund folkebibliotek går saman om digital formidling og festivalsamarbeid.

I desse tider må både folkebibliotek og litteraturfestivalar tenkja nytt, og Falturiltu sitt programråd er veldig glade for dette samarbeidet, samt å bli med på den andre runden i Haugesund folkebibliotek sin #nettlest-serie.

Haugesund folkebibliotek har saman med Falturiltu valt ut fem ulike nynorske barne- og ungdomsbokforfattarar. Her blir det alt frå faktabøker for dei små til fiksjon for ungdom. Videoane blir tilgjengelege på denne Youtube-lenka.

Det heile tek til fredag 3. april med Malin Hellebø som fortel om dei beste sjekketriksa til dyra. Etter det vil det bli formidling kvar dag fram til tysdag 7. april. Falturiltu sin festivalforfattar Atle Hansen kjem sjølvsagt, og presenterer frå dei tre bøkene Klure, Apetryne og Svartedalen. Det blir meir dyrefokus med skodespelar og forfattar Mats Eldøen som undrar på kva som ville skjedd dersom me menneske hadde hatt dyra sine eigenskapar.

Ekstra spennande blir det å presentera to forfattardebutantar, nemleg Sigrid Agnethe Hansen som skriv om nakenbilete som blir spreidd på nettet i boka Ser du dette, og Ann Helen Kolås Ingebrigtsen som tek opp ADHD, forelsking og venskap med boka Sinne.

Fleire av desse forfattarane blir å møta under Falturiltufestivalen til hausten som tek til 31. oktober.